Ora bo tin un problema médiko, un malesa di infekshon por desaroyá na un manera mas grave ku serka un hende ku ta salú. Segun nos ta birando mas grandi (riba 60 aña) nos sistema imunológiko ta bira ménos, di manera ku nos tin un chèns mas grandi pa bira gravemente malu. E ora ei nos por konsehá bakunashon èkstra.
Angua kontra grip i angua kontra COVID-19
Un vírùs ta okashoná grip i COVID-19. Tin hende ku tin mas chèns pa bira gravemente malu di grip òf di COVID-19. Tin angua kontra grip i kontra COVID-19. E anguanan akí ta yuda bo kurpa traha antikurpa kontra e vírùs, di manera ku bo tin ménos chèns pa bira malu. Si bo bira malu tòg, e ora ei e sìntomanan ta ménos grave.
Hende ku tin mas chèns pa bira gravemente malu di grip òf COVID-19:
- Hende ku keho di kurason
- Hende ku problema di pulmon, manera asma, bronkítis òf COPD
- Hende ku malesa di suku (diabétis)
- Hende ku problema di nir
- Hende ku un sistema imunológiko debilitá
- Hende ku ta na estado
- Hende riba 60 aña
Tur aña Salubridat Públiko ta ofresé angua kontra grip i angua kontra COVID-19 pa personanan ku tin mas chèns pa bira gravemente malu di grip òf COVID-19. E angua kontra grip i e angua kontra COVID-19 ta grátis pa personanan ku tin mas chèns pa bira malu.
Angua kontra pneumokòk (bakteria di pulmonia)
Un pneumokòk ta un bakteria. Pneumokòk por okashoná pulmonia. Tin hende ku tin mas chèns pa bira gravemente malu di e bakteria akí. E mihó manera pa prevení malesa di pneumokòk ta pa medio di bakunashon. E bakunashon ta yuda bo kurpa traha antikurpa kontra e bakteria, di manera ku bo tin ménos chèns pa bira malu. Si bo bira malu tòg, e ora ei e síntomanan hopi biaha ta ménos grave.
Hende ku tin mas chèns pa bira malu debí na pneumokòk:
- Hende di 60 aña bai ariba
- Hende ku un sistema imunológiko ménos bon
- Hende ku a haña daño na pulmon, debí na COVID-19
Bo por pasa angua kontra pneumokòk serka bo dòkter di kas.
E angua kontra pneumokòk ta grátis pa hende ku tin mas chèns pa bira malu debí na pneumokòk.
Angua kontra kolibrí
Kolibrí ta un rebultashon doloroso di kueru ku ta keda okashoná pa e mesun vírùs ku ta okashoná sende paga. Tin hende ku tin mas chèns pa haña kolibrí. Ta trata akí di: hende grandi, hende ku un sistema imunológiko redusí i hende ku HIV. Pa e gruponan akí un bakunashon por ta útil pa protehá nan kontra kolibrí i e kehonan grave debí na kolibrí. Tambe si un hende for di e gruponan akí a yega di haña kolibrí kaba, e bakunashon por ta útil pa prevení un infekshon nobo di kolibrí.
- Bo por pasa angua kontra kolibrí serka bo dòkter di kas.
- E angua kontra kolibrí ta grátis solamente pa hende ku un sistema imunológiko redusí òf pa hende ku HIV. Bo ke pasa angua kontra kolibrí pa motibu di bo edat òf pa otro motibu? E ora ei bo mes tin ku paga pa e angua. E angua kontra kolibrí ta kosta mas òf ménos 360 dòler pa unu. E seri di bakunashon ta konsistí di 2 angua.
