Bo ta verwagt un beibi? Masha pabien! Nos ta ofresé hende muhé na estado algun bakunashon pa protehá tantu nan propio salú komo salú di nan beibi. Salubridat Públiko ta ofresé e bakunashonnan akí na nos ubikashon prinsipal òf na departamento di Kuido di Salú Hubenil.
Nos ta ofresé 3 bakunashon durante embaraso:
Bakunashon kontra kenkust (angua di 22 siman)
Mas òf ménos na e di 22 siman di embaraso, e mama ta haña un bakunashon kontra difteria, kenkust i tétano (DKT). Esaki ta protehá e beibi kontra kenkust den e promé tres lunanan despues di su nasementu.
- Bo por pasa e angua kontra kenkust na departamento di Kuido di Salú Hubenil di Salubridat Públiko. Bo partera ta informá bo tokante esaki.
- E angua kontra kenkust ta grátis pa hende muhé na estado.
Angua kontra grip
Beibi ku a kaba di nase i hende muhé na estado tin un riesgo mas grandi pa konsekuensia grave di grip, manera sinti benout òf hospitalisashon. E angua kontra grip ta redusí e chèns pa haña grip i pa bira gravemente malu di grip. Esaki ta konta tantu pa e beibi komo pa bo mes. Grip ta aparesé na Boneiru prinsipalmente durante e lunanan di wenter den e hemisferio nort.
- Durante bo embaraso bo por pasa angua kontra grip solamente si entre 15 di òktober i 1 di maart bo ta 22 siman na estado òf mas tantu tempu.
- Bo ta pasa e angua kontra grip na bo propio dòkter di kas òf na Salubridat Públiko.
- E angua kontra grip ta grátis pa hende muhé na estado.
Angua kontra COVID-19
Nos no ta ofresé e angua kontra COVID-19 den forma standart mas na hende muhé na estado. Solamente hende muhé na estado ku tin problema ku salú (malesa di pulmon, kurason, higra òf nir, malesa di suku i obesidat) nos ta rekomendá fuertemente pa pasa angua kontra COVID-19. E hende muhénan na estado akí tin un riesgo mas grandi pa un malesa grave debí na COVID-19, manera sinti benout òf hospitalisashon.
- Bo ta pasa e angua kontra COVID-19 na Salubridat Públiko.
- E angua kontra COVID-19 ta grátis pa hende muhé na estado.
