Infekshon di stoma i tripa ta malesa di stoma i tripa. Ehèmpel di esakinan ta habrimentu di barika òf salmonela. Bo por haña e malesanan akí debí na kuminda òf awa kontagiá, òf via kontakto ku un persona ku ta malu. E kehonan hopi biaha ta walmentu di stoma, sakamentu i diarea. Sierto infekshonnan di stoma i tripa por ta grave, spesialmente pa mucha yòn, hende grandi òf hende ku un salú débil. E norovírùs ta e kousa mas komun di brote di habrimentu di barika.
Habrimentu di barika (manera e norovírùs)
Habrimentu di barika ta un malesa ku un vírùs òf un bakteria ta kousa. Hopi hende ta haña habrimentu di barika debí na kuminda òf kos di bebe kontagiá, òf pa medio di kontakto ku un hende ku ta malu. E kehonan ta entre otro diarea, walmentu di stoma, sakamentu, kram den barika i tin ora kentura. Mayoria biaha e kehonan ta dura algun dia. Habrimentu di barika ta fastioso, pero mayoria biaha e ta kura di su mes.
Pa mas informashon bo ta bishitá:
- E página di ‘Thuisarts’ tokante habrimentu di barika: https://www.thuisarts.nl/buikgriep
- E página di RIVM tokante e norovírùs:https://www.rivm.nl/norovirus
Kiko Salubridat Públiko ta hasi?
- Salubridat Públiko ta yuda prevení plamamentu di infekshon di stoma i tripa. Nos ta duna konseho na habitantenan, skolnan, barkunan (krusero), institutonan di kuido i dunadónan di kuido. Pensa por ehèmpel riba konseho tokante higiena.
- Salubridat Públiko ta hasi investigashon di infekshon di stoma i tripa. Salubridat Públiko ta monitoreá kuantu biaha tin infekshon di stoma i tripa na nos isla. Nos ta kolektá informashon di e laboratorionan (manera resultado positivo di tèst) i di e konsultanan di dòkter di kas. Esaki Salubridat Públiko ta usa pa mira si tin mas hende ta bira malu ku normal, di manera ku nos por tuma akshon na tempu.
