Infekshon di via respiratorio (manera grip i corona)

Infekshon di via respiratorio ta malesa na nanishi, garganta òf pulmon. Pensa por ehèmpel riba fèrkout, grip, COVID-19 òf pulmonia. E malesanan akí mayoria biaha ta plama pa medio di drùpel chikitu den aire, debí na tosamentu òf nistermentu. Sierto infekshon di via respiratorio por ta grave, prinsipalmente pa hende grandi òf hende ku un salú débil.

Kiko Salubridat Públiko ta hasi?

  • Tur aña bo por akudí na Salubridat Públiko pa bakunashon kontra sierto infekshonnan di via respiratorio. Tin bakuna kontra grip i COVID-19. Pa mas informashon tokante e bakunashonnan akí, wak e página: Gruponan di riesgo médiko
  • Salubridat Públiko ta yuda pa prevení plamamentu di infekshon di via respiratorio. Nos ta duna konseho na habitantenan, skolnan, barkunan (krusero), institutonan di kuido i dunadónan di kuido. Pensa por ehèmpel riba konseho tokante higiena i bakunashon.
  • Salubridat Públiko ta vigilá kuantu biaha tin infekshon di via respiratorio na nos isla, pa medio di kolektá dato di e laboratorionan (manera resultado positivo di tèst) i di e konsultanan di dòkter di kas. Salubridat Públiko ta usa esaki pa wak si tin mas hende ta bira malu ku normal, di manera ku nos por tuma akshon na tempu.

Grip (influenza)

Grip ta un malesa ku e vírùs di influenza ta okashoná. Hopi hende ta kere ku nan tin grip ora nan tin molèster di tosamentu, nanishi será i fèrkout. Esaki por lo general ta dura solamente algun dia i hopi biaha no ta grip, sino fèrkout. Grip por dura 1 pa 2 siman i tin síntomanan mas grave, manera kentura haltu, doló fuerte di múskulo i kansansio.

Pa mas informashon bo ta bishitá: 

Corona (COVID-19)

E vírùs di corona SARS-CoV-2 ta okashoná e malesa COVID-19. Hopi hende ta konfundí COVID-19 ku un fèrkout komun, prinsipalmente ora nan tin molèster di tosamentu, nanishi será i doló di garganta. Esakinan ta síntoman leve ku ta pasa rápidamente, pero COVID-19 por duna síntomanan mas grave manera kentura haltu, doló fuerte di múskulo, kansansio, i den sierto kasonan problema ku halamentu di rosea.  

Pa mas informashon bo ta bishitá: