Pa komprendé salú di nos poblashon bon, Salubridat Públiko ta kolektá dato tokante salú di habitantenan di Boneiru. Kuantu biaha esaki ta sosodé, ta dependé di e tópiko. Di sierto tópikonan nos ke sa tur siman kon e situashon ta na Boneiru: manera e kantidat di dengue, grip òf keho di barika. Otro tópikonan nos ta monitoreá periódikamente: manera malesa transmití seksualmente, malesa króniko, estilo di bida i uso di kuido.
Salubridat Públiko ta ehekutá investigashon di salú. Hopi biaha GGD ta hasi esaki huntu ku organisashonnan for di otro paisnan, manera PAHO, CARPHA, RIVM, Mullier Instituut, JOGG i diferente universidat. Kada kuater aña nan ta akumulá tur informashon huntu den un raportahe di salú. A base di e resultadonan nan ta formulá ‘prioridatnan di salú’ pa e siguiente kuater añanan. E prioridatnan di salú akí nan ta stipulá den maneho (por ehèmpel e Nota Volksgezondheid – Nota di Salubridat Públiko) i nan ta deliberá tokante esakinan ku partnernan di kolaborashon: manera Kolegio Ehekutivo, dunadónan di kuido i siudadanonan.
Banda di esaki GGD ta yuda ku desaroyo di maneho spesífiko riba tereno di salubridat. Nan ta duna konseho na otro organisashonnan riba tereno di salubridat i nan ta traha huntu pa mehorá salú. Por ehèmpel den kaso di kalamidat, riesgo di salú òf komportashon insaludabel.
Programanan di salú ta esensial pa promoshon di salú i prevenshon. Evaluashon profundo, tantu di e efektonan ku a logra komo di e proseso, ta krusial pa komprendé kiko ta funshoná, pa ken i dikon. Esaki ta hasi posibel pa Salubridat Públiko mehorá su programanan na un manera dirigí i pa hasi maneho mas efektivo i ku mas enfoke riba meta.
